1956-yil 1-yanvarda SSSR Vazirlar Kengashining 1955-yil 24-avgustdagi 1558-sonli “Loyihalash tashkilotlari faoliyatini yaxshilash chora-tadbirlari to‘g‘risida”gi qaroriga muvofiq, “O‘zgiprovodxoz” instituti elektrlashtirish bo‘limi negizida SSSR Shahar va qishloq qurilishi vazirligi tarkibida “Giproselenergo” institutining O‘zbekiston filiali tashkil etildi.

SSSR Vazirlar Kengashining 1964-yil 31-yanvardagi 178-r-sonli qaroriga asosan institut Butunittifoq ilmiy-tadqiqot va loyihalash instituti “Selelektro” tarkibiga o‘tkazildi. SSSR Energetika vazirligining buyrug‘iga muvofiq institut tarkibida kompleks loyihalash bo‘limlari shaklida quyidagi filiallar tashkil etildi: Turkmaniston OKP (Ashxobod shahri), Qirg‘iziston OKP (Frunze shahri) va Tojikiston OKP (Dushanbe shahri). Ushbu filiallar negizida 1989–1991-yillarda Turkmaniston, Qirg‘iziston va Tojikiston respublikalarida mustaqil respublika institutlari tashkil etildi.

1969-yil 17-sentabrdan boshlab SSSR Energetika va elektrlashtirish vazirligining 1969-yil 25-avgustdagi 111a-sonli buyrug‘iga asosan institut “Selenergoproekt” Butunittifoq davlat loyiha-qidiruv va ilmiy-tadqiqot institutining O‘rta Osiyo bo‘limi deb qayta nomlandi.

Toshkent shahri Hamza tumani Xalq deputatlari Kengashi ijroiya qo‘mitasining 1991-yil 3-oktabrdagi 532/24-14-son qaroriga muvofiq “Selenergoproekt” institutining O‘rta Osiyo bo‘limi “Sredazselenergoproekt” O‘rta Osiyo ilmiy-tadqiqot, loyiha-qidiruv va konstruktorlik-texnologik instituti ijara korxonasi deb qayta tashkil etildi.

O‘zbekiston Respublikasi Prezidenti huzuridagi Vazirlar Mahkamasining 1992-yil 13-oktabrdagi 471-son qaroriga muvofiq, ilgari SSSR Energetika vazirligiga bo‘ysungan “Sredazselenergoproekt” instituti 1992-yil 1-oktabrdan boshlab O‘zbekiston Respublikasi Energetika vazirligi tarkibiga kiritildi.

Toshkent shahri Hamza tumani hokimligining 1998-yil 28-sentabrdagi 1117-son qaroriga muvofiq institut “O‘zselenergoloyiha” loyiha-qidiruv instituti ijara korxonasi deb qayta nomlandi.

2002-yil 12-sentabrdan boshlab Davlat mulki qo‘mitasining 2002-yil 13-iyundagi 153k-PO-son buyrug‘iga muvofiq loyiha-qidiruv instituti “Qishloqenergoloyiha” ochiq aksiyadorlik jamiyatiga (OAJ “SELENERGOPROEKT”) aylantirildi.

2014-yil 16-iyulda O‘zbekiston Respublikasining “Aksiyadorlik jamiyatlari va aksiyadorlar huquqlarini himoya qilish to‘g‘risida”gi Qonunining yangi tahriri talablariga muvofiq OAJ “Qishloqenergoloyiha” AJ “Qishloqenergoloyiha” deb qayta nomlandi.

O‘zbekiston Respublikasi Prezidentining 2019-yil 27-martdagi PQ-4249-sonli “O‘zbekiston Respublikasi elektroenergetika tarmog‘ini yanada rivojlantirish va isloh qilish strategiyasi to‘g‘risida”gi qarori hamda aksiyadorlarning 2019-yil 24-maydagi navbatdan tashqari umumiy yig‘ilishining 4-son bayonnomasiga asosan AJ “Qishloqenergoloyiha” negizida zamonaviy ko‘p tarmoqli tashkilot — AJ “O`ZENERGOINJINIRING” tashkil etildi.